زي ما بنشوف في الفعاليات اللي بتحصل في البطولات العالمية، لما اللجان المنظمة بتختار حيوان ظريف وغالبا بيبقى ” اخطبوط” عشان يبقى ثعباني ومتعرفش هيعمل ايه، ويجي الأخطبوط يتوقع مين هيكسب الماتش (بيحطوله أكل في طبقين وعليهم أعلام الفرق ويشوفوا هياكل مين)، رابطة الأندية في الجمهورية الجديدة بتفكر تقلد الحركة دي كنوع من الحلول لأزمة بطل الدوري، للخروج من أزمة بطل الدوري السنادي، وبالمرة الموضوعي يبقى فيه تسويق وفلوس داخل للرابطة ودعاية. 

و على رأي المدير التنفيذي لرابطة الأندية الأستاذ عزت سويلم:
” وفيها إيه لما نطلع بمصلحة من الدوري.. ما كلها بترزق و بتاكل عيش”

بداية اللغبطة: “العفي محدش يقدر ياكل لقمته” 

عقب انسحاب الأهلي من مباراة القمة أمام الزمالك يوم 11 مارس الماضي، رابطة الأندية دخلت في ورطة.

من ناحية، كان لازم يرضوا جمهور الزمالك اللي فريقهم حضر الماتش، فادّوه الفوز 3-0 واحتسبوا له التلات نقط. لكن من ناحية تانية، الرابطة خافت تزعل جمهور الأهلي أكتر، فقررت ما تخصمش أي نقاط إضافية من الأهلي. 

ساعتها بيراميدز دخل على الخط وقالوا: لا بقا هو عشان أنا فرقة معنديش جماهير تعملوا معايا كدا؟
بس بصراحة، الاعتراض ده ماعملش أي دوشة، ومحدش بص عليه أصلًا.

أو كما صرح الأستاذ أحمد الديب رئيس رابطة الأندية المصرية:
” العفي محدش يقدر ياكل لقمته.. وأنا عايز أكل عيش و مش عايز ازعل الكبير مني” 

يارب يكتر أفراحنا:

كالعادة، المصريين لما يفرحوا لازم يفرحوا بزيادة. لاعيبة بيراميدز والجهاز الفني قرروا يشاركوا الأهلي فرحة الدوري، مع إنهم خسروا اللقب! والسبب إنهم كانوا محضرين منصة تتويج على ستاد قناة السويس. 

بعض خبراء النفس قالوا إن احتفالهم بعد الخسارة ده مش معناه انهم بيحتفلوا بفوزهم بالدوري المصري، بس أغلب الظن إنهم مش عايزين يضيعوا تأجير الفراشة والدي جي على الفاضي

ومينفعش يعني ننصب الصوان ومنعملش النمرة!