في إطار سعي الدولة المستمر لتوفير تجربة صيفية مختلفة للمواطن، تجربة فيها كهرباء لا تنقطع، وحياة تحت هواء التكييف البارد، أعلن رئيس الوزراء المصري – بمنتهى الثقة – أن هذا الصيف “لن يشهد أي تخفيف أحمال”.

تصريح رفع معنويات الشعب ، وخلّى بعض المواطنين ينزلوا يشتروا لمبات زيادة، ويبعزقوا بقا 

 لكن فجأة، وبدون سابق إنذار ومع أول موجة حر اعلنت محافظة المنيا رسميًا عن إغلاق المحلات الساعة 10 مساءً، ضمن خطة لترشيد استهلاك الكهرباء!
ترشيد كهرباء ! هو إيه اللى بيحصل ؟ ده الدكتور مصطفى مدبولي مأكدلنا إن مفيش تخفيف أحمال تاني!

مصطفى مدبولي: قطع الكهرباء في حب مصر

في عهد السيد الرئيس رئيس الجمهورية الجديدة، انقطاع الكهرباء مش مجرد أزمة أو مشكلة فنية، لا دي رمز من رموز حب الوطن والتضحية في سبيله. 

و ده اللي صرح بيه المتحدث الرسمي لوزراة الكهرباء:
“انقطاع الكهرباء مش عيب، ده دليل إننا بنزرع في المواطنين قيمة الصبر والتحدي، احنا مش بنقطع النور، احنا بننظّم وقفات تأمل إجباريّة على ضوء الشموع،  الناس دلوقتي بتتعلم كيف تحب مصر من غير كهربا، وده إنجاز وطني حقيقي.”

المهندس/ عز الدين الساطع عضو لجنة الشؤون المعنوية للجمهورية الجديدة كمان أدلى بدلوه وقال:
“انقطاع الكهرباء مش عيب ، ده حتى الأستاذ مدحت صالح قال النور مكانه في القلوب”

وساعات بتشوف الأمل في وسط العتمة! 

الإعلام المصري لم يفوت الفرصة
و في تصريح هام مساء أمس وفي برنامجه على قناة صدى البلد قال الإعلامي أحمد موسى:

في النور، المواطن بيبص تحت رجليه… في الضلمة، بيبص جوا قلبه.
في النور، بتحس إنك عايش… في الضلمة، بتسأل نفسك: “هو أنا ليه عايش؟”الدولة مش بس بتفصل الكهرباء، دي بتشغّللك عقلك، بتفصل عنك الإضاءة علشان توصّلك للوعي.

الإعلامي نشأت الديهي صرح أيضًا:
“الدراسات الحديثة بتقول إن الإنسان بيشوف ٣ مرات أكتر في الضلمة، بشرط يكون النور قافل من الحكومة، القعدة في الضلمة بتخلي المواطن يشوف النور الحقيقي: إنجازات الرئيس.”

انقطاع الكهرباء.. فوائد الحرّ للمواطن المصري

الدكتور/ شفيق الحران، أخصائي علوم الصهد أكد في ندوة أقيمت أول أمس، أن ارتفاع الحرارة بيُعيد ضبط كيمياء الجسد.

كما أثبتت آخر الدراسات “اللي قالهالنا رئيس الوزراء بس مقلش مصدرها إيه” إن العرق المصري أغنى من نظيره الأوروبي.. وده بيفتح باب التصدير مستقبلاً،
خصوصًا في ظل اتجاه الدولة لخلق مصادر دخل غير تقليدية، زي “المواطن المنتج” اللي مش بس بيشتغل.. لأ، كمان بيعرق بجودة تصديرية، والعرق ده ممكن يدخل في صناعات زي الأسمدة العضوية، أو يتم تعليبه في زجاجات تحت اسم “عرق فرعوني ١٠٠٪ طبيعي – طالع من أصل طيب” 

كما قالت الدكتورة: كاميليا القرفان رئيسة المركز القومي لـ”للتوعية الداخلية”:
“الضلمة مش مجرد غياب نور… الضلمة حالة. حالة تأمل، حالة إعادة ضبط. المواطن لما الكهربا بتفصل، بينفصل عن التشويش البصري، وبيشوف مشاكل حياته من منظور أنضج… إحنا بنساعد الناس تواجه نفسها.”

شكر خاص من القلب للسيد الرئيس

في جولة ميدانية بمنطقة دار السلام، التقينا المواطن/ حسنين اللي قال وهو باصص للسماء:
“أنا بشكر سيادة الرئيس، بجد، إننا بنتربى، الكهربا لو كانت طول الوقت موجودة، كنا هنبقى ناس فاسدين، كسالى”

أما الحاجة حفيظة، فكشفت الجانب الإيجابي من انقطاع الكهرباء وقالت:“أول مرة أقعد مع جوزي من غير ما التليفزيون يشغلنا… طلع بني آدم طيب والله!”

وفي استطلاع رأي أجرته مؤسسة “عيش من غير كهرباء”، جاءت النتائج كالتالي:

• 74٪ من المواطنين قالوا “الحر ده تهذيب”
• 21٪ قالوا “الضلمة مفيدة”
• 5٪ انقطع عنهم الاتصال قبل ما يكمّلوا الجملة

وفي النهاية، لازم نفهم إن اللي بيحصل ده مش مجرد حر بيقرفنا ولا كهربا بتروح وتيجي وبتبوظ أجهزة بيوتنا لأ، دي خطة أعمق، فيها بُعد وطني، وبعد رُوحي كمان.
الدولة ما بتقطعش النور، هي بس بتديك فرصة تكتشف “النور اللي جواك وتدور جوه نفسك على ذاتك اللي ضايع”.

فلو الحر لعب في مخك، أو أعداء الوطن فهموك ان الدولة وحشه او السيد الرئيس قلبه مش عليك قول في سرك:
“أنا حالياً مشارك في خطة قومية لإعادة الوطن إلى المكانه التي يستحقها وتذكر دائمًا عزيزي المواطن إن: النور مكانه في القلوب